For uns Kinn, for mich ganz sicher, war de schennst Eck die owwer Altgass: Vun der Bennos Gass bis zu Linze owwers Dorf, un driwwe uf der Seit nunner bis zum Pannerts Haus. Do hot mer sich am beste gekennt un is aa in jed’m Haus rumkumm. Do ware meist kloone, äldre Heiser, mit Spitzgewl un lange uffne Gäng mit Holzphoste. Meist kloone odr halwe Gerechtichkeite, ka reiche Leit. Uff de Mitte Gass owwe is e Bildstock, unser Wendlini. De Heilich Wendelin – des is am 20. Oktower – is de Schutzpatron vun de Baure, Hirte un Schäfer, vum Viech, er werd bei Viechkrankheite ongeruf.

Der Bildstock war gstift wor vun der Altgässer Familije Linz, dem Großvattr vum Vedr Matz. Dee ware mol sechs Pheer an ooner Seiche krank woor, sie hun die Pheer all schieße misse un de Stall oone Meter tief ausgraawe, un nooh hun se neie Pheer kaaft. Das des net wedder vorkummt hun se de Stock gstift un iwtzt, de Sockl war meist hell grien geweiselt un owwe war weiß geweiselt. In der Nische mit Blick uff die ganz Gass nunner war die kloon Statue vum Heiliche Wendelin, ee Zeit war nor e Bild drin. De Wendelin hot e griene Mantel um, er war bloßfiesich un hot Sandaln oon, un e Schoof uff'm Arm. Dass grad in de Altgass de Wendlini steht un emwer Generatione imstand ghall. Der war ingezeint un rundrum war e Blumegärtche. Friehjer is an Wendlini noch e Prozion do her kumm an dem Feiertach, alle zwaa Johr, der selmols noch vill wichticher war. Zuletzt hun meehr un aa phaar annre Leit als noch Blume hingstellt odr geleet, die was in de Kerch gseehnt ware. Der zwaate Wendlini Bildstock war im unner Dorf, es weiß Kreiz hun die Leit korz gsaat, des war an der Hinreih grad nunner, uff d’r Hutwaad, net weit vum Schinderkerchhuf un lins vun d’r, Bohnlinie, ich moon Zukrotaije hot mer gsaat. Der Stock war angeblich vum Wendelin Anton Bauer gstift, der war aus d’r Hinreih, vorher in dem Haus vun mei’m Grawatzer Großvattr, nooh hun se de iwwernomm, mei Mottr kann sich erinnre das sie de geweißelt un im stand ghall hun noch nooh dem Kriech. Die Prozion is nooh e jeds zwaates Johr do hingang. Der Stock war aa so e Fixpunkt, uffm Hotter for die Vermessunge un de viert war an de Csarda, am Dorfeingang. Nooh dem Wendlini Taach, hun die Baure sich awwer aa ghall mit eehre Feldarwet, do hot die Frucht misse in d’r Erd sin, es hun sich mol zwaa Baure uffm Feld getroff, e jeder uff seim Woohn, hun bißche verzeehlt, nooh saat der oon na ja morje is Wendlini, nooh der anner waaas? morje is Wendlini? heerscht Gitran (sei Pheerd) do haast’s jaahn, ich hun mei Frucht net in d’r Erd, hot uff’s Pheerd druffgschlaa un gemma fort war er.

(Auszug aus einem der Beiträge über die älteste Jahrmarkter Gasse, und zwar über die obere Altgasse, von Margarete Heckmann, geborene Seibert, für das geplante Buch in Mundart „Vun Haus zu Haus, dorch’s ganze Dorf“)